^1:1 A cumentzu fiat su Verbu, su Verbu fiat a nde Deus e su Verbu fiat Deus. ²A cumentzu issu fiat a nde Deus: ³totu cantu esti stètiu fatu po mori de issu, e ken''e issu no esti stètiu fatu nudda de totu su ki du esti. ⁴In issu fiat sa vida e sa vida fiat sa luxi de is òminis; ⁵sa luxi allùmiat su scurigori, ma su scurigori no d'at arricia.  
⁶Fiat bènniu un'òmini imbiau de Deus ki di naranta Juanni. ⁷Issu fiat bènniu ke tistimonju po donai tistimonju a sa luxi, de manera ki totus, ascurtendiddu, iant'essi crètiu. ⁸Issu no fiat sa luxi, ma depiat donai tistimonju a sa luxi.
⁹In su mundu esti bènnia sa luxi bera, sa ki allùmiat donnya òmini. ¹⁰Issu fiat in su mundu, e su mundu esti stètiu fatu po mori de issu, perou su mundu no d'at arreconnotu. ¹¹Fiat bènniu in mesu a sa genti sua, ma sa genti sua no d'iat arriciu. ¹²Perou, a is ki d'ant arriciu, at donau su poderi de benni fillus de Deus: a is ki creint in su nòmini suu, ¹³a is ki no funti stètius fatus ni de su sànguni, ni de su bolli de sa carri, ni de su bolli de s'òmini, ma de su bolli de Deus. ¹⁴E su Verbu si fiat fatu òmini e fiat bènniu a bivi in mesu a nosu; e nosu eus biu sa gròria sua, sa gròria ke a unigènidu de su Babu, prenu de gràtzia e de beridadi.
¹⁵Juanni d'iat donau tistimonju tzerriendi: «Alloddu s'òmini ki deu emu nau: Su ki benit a pustis de mei m'esti passau a innantis ca fiat a primu de mei». ¹⁶De sa prenesa sua totus nosu eus arriciu gràtzia a pustis de gràtzia. ¹⁷Custu ca sa lei d'eus tenta po mèdiu de Mosè, sa gràtzia e sa beridadi d'eus arricia po mori de Gesugristu. ¹⁸Nisçunus at biu mai a Deus: esti stètiu pròpriu su Fillu unigènidu, ki est in su sinu de su Babu, ki d'at arrevelau.
¹⁹E custu esti su ki iat tistimonjau Juanni, candu is Judeus d'iant imbiau satzerdotus e levitas, de Gerusalemi, a di preguntai: «Tui, kini ses?». ²⁰E issu iat amìtiu e no iat dennegau, e iat amìtiu: «Deu no seu su Messia». ²¹Insandus d'ìanta preguntau: «Ma kini ses tui? Elia ses?». Iat arrespùndiu: «No seu Elia». «Su profeta ses?». Iat arrespùndiu: «No'». ²²Duncas d'ìanta nau: «Ma insandus, kini ses? Po torrai sceda a is ki s'ant imbiau. Ita si naras de tui e totu?». ²³Iat arrespùndiu: «Deu seu sa boxi de unu ki tzèrriat in s'arètigu: Apariçai s'arruga de su Sennori, aici comenti iat nau su profeta Isaia». ²⁴A issus dus iant imbiaus is fariseus. ²⁵D'ìanta preguntau e d'ìanta nau: «Po ita ses batiendi, mancai no sìasta ni su Messia, ni Elia, ni su profeta?». ²⁶E Juanni dis iat arrespùndiu: «Deu bàtiu cun s'akua, ma in mesu a bosatrus du at unu ki no connosceis, ²⁷unu ki benit a pustis de mei, unu ki no di seu dinnyu de di scapiai sa cordonera de sa sandàlia».
²⁸Totu custu fiat sutzèdiu in Betània, a barigau de su Jordanu, aundi Juanni fiat batiendi. ²⁹S'incrasi Juanni, biendi a Gesùs benendi faci a issu, iat nau: «Alloddu s'anjoni de Deus, alloddu su ki ndi bògat su pecau de su mundu! ³⁰Alloddu su ki deu emu nau: A pustis de mei benit un'òmini ki m'esti passau a innantis, ca fiat a primu de mei. ³¹Deu no du connoscemu, ma seu bènniu a batiai cun s'akua de manera ki fessit espressau a Israeli». ³²Juanni iat donau tistimonju nendi: «Apu biu a su Spìridu calendi ke a una columba de su celu e arrimendisi' a pitzu de issu. ³³Deu no du connoscemu, ma su ki m'iat cumbidau a batiai cun s'akua m'iat nau: S'òmini ki as a biri calendinci e abarrai su Spìridu esti su ki bàtiat cun su Spìridu Santu. ³⁴E deu apu biu e apu donau tistimonju ki issu esti su Fillu de Deus».  
³⁵S'incrasi Juanni fiat torra a ingunis cun duus de is iscientis suus ³⁶e, castiendi a Gesùs ki fiat passendi, iat nau: «Alloddu s'anjoni de Deus!». ³⁷E is duus scientis, intendendiddu kistionendi aici, ìanta sighiu a Gesùs. ³⁸Insandus Gesùs si fiat furriau, biendi ki du fìanta sighendi, e d'iat nau: «Ita seis cirkendi?». E issus d'iant arrespùndiu: «Rabì (ki bolit nai maistu), aundi bivis?». ³⁹E issu d'iat nau: «Benei, i eis a biri». 
Duncas fiant andaus e ìanta biu aundi biviat e sa di' fiant abarraus cun issu; fìanta prus o mancu is cuatru de a meri'. ⁴⁰Unu de is duus, ki iant intèndiu is fueddus de Juanni e ki ìanta sighiu a Gesùs, fiat Andria, su fradi de Simoni Perdu. ⁴¹Su primu ki iat atopau fiat pròpiu Simoni, su fradi, e d'iat nau: «Eus agatau su Messia (ki bolit nai su Cristu)» ⁴²e d'iat condùsiu a nde Gesùs. Gesùs, castiendiddu, d'iat nau: «Tui ses Simoni, su fillu de Juanni; de imoi t'ant a nai Cefa (ki bolit nai Perdu)». ⁴³S'incrasi Gesùs iat detzìdiu de partiri po sa Galilea; iat atopau a Filipu e d'iat nau: «Sighimi'». ⁴⁴Filipu fiat de Betsàida, sa tzitadi de Andria e de Perdu. ⁴⁵Filipu iat atopau a Natanaeli e d'iat nau: «Eus agatau a Gesùs, fillu de Jusepi de Nàzaret, su ki nd'ìanta scritu Mosè, in sa Lei, e is Profetas». ⁴⁶E Natanaeli iat nau: «De Nazaret, ndi podit benni calincuna cosa de bonu?». Filipu d'iat arrespùndiu: «Beni e càstia». ⁴⁷In su mentras Gesùs, ki iat biu a Natanaeli ki fiat benendi faci a issu, iat nau: «Alloddu un Israelita ki deaderus no tenit farsidadi». ⁴⁸Natanaeli d'iat preguntau: «E comenti mi connoscis?». E Gesùs d'iat arrespùndiu: «A primu ki Filipu t'iat tzerriau, deu t'apu biu a suta de sa mata 'e sa figu». ⁴⁹E Natanaeli d'iat nau: «Rabì, tui ses su Fillu de Deus, tui ses s'urrei de Israeli!». ⁵⁰Gesùs d'iat arrespùndiu: «Sigumenti t'apu biu a suta de sa mata 'e sa figu, tui creis? As a biri cosas prus mannas de-i custas!». ⁵¹A pustis d'iat nau: «In beridadi, in beridadi si nau: eis a biri su celu obertu e is ànjulus de Deus artziendi e calendi a susu 'e su Fillu de s'òmini».


^2:1Tres diis a pustis nci fiat stètia una coya in Cana de Galilea e nci fiat sa mama de Gesùs. ²A sa coya fiat stètiu cumbidau Gesùs puru imparis a is iscientis suus. ³In s'interis, sigumenti fiat acabau su binu, sa mama de Gesùs d'iat nau: «No tèninti prus binu». ⁴E Gesùs d'iat arrespùndiu: «Sa fèmina, ita depu fai cun tui? S'ora mia no est arribada ancoras». ⁵E sa mama iat nau a is serbidoris: «Feis su ki si nàrat». ⁶S'agatant a ingunis ses bùrnias de perda po s'acrisoladura (sa prugadura de is pecaus) de is Judeus, e donnyuna teniat una capidura de duus o tres barrilis. ⁷E Gesùs d'iat nau: «Prenei is bùrnias de akua»; e issus das ìanta prenas finsas a su pillu. ⁸E iat sighiu a nai: «Imoi donaindi a bufai a su maistu 'e mesa». E issus si nd'ìanta donau a bufai. ⁹E comenti iat tastau s'akua ki fiat bènnia binu, su maistu 'e mesa, ki no sciiat de aundi ndi beniat cussu binu (ma du sciìanta is serbidoris ki ìanta pigau s'akua), iat tzerriau su sposu ¹⁰e d'iat nau: «Totus cantus a cumentzu sèrbinti su binu bonu e, candu funti unu pagu inçarius, sèrbinti su ki esti prus pagu bonu; tui imbeças as allogau finsas a imoi su binu bonu». ¹¹Aici Gesùs iat donau cumentzu a is miràculus suus in Cana de Galilea, espressendi sa gròria sua e is iscientis suus ìanta crètiu in issu. 
¹²A pustis de-i custu acontèssiu, fiat calau in Cafarnau impari a sa mama, is fradis e is iscientis suus e si fìanta firmaus a ingunis po calincuna di' sceti. ¹³ In s'interis fiat benendi su tempus de sa Pasca de is Judeus e Gesùs fiat atziau in Gerusalemi. ¹⁴In sa pratza de su tempru iat agatau a genti ki bendìanta bois, brebeis e columbas, e cambiadoris de dinai ki fìanta sètzius in su bangu. ¹⁵ Insandus iat fatu unu fuetu de funixeddas e nc'iat bogau totus cantus a foras de sa pratza de su tempru, impari a is brebeis e a is bois; iat ghetau a terra su dinai de is cambiadoris e iat furriau concas a terra is bangus, ¹⁶e a is bendidoris de columbas d'iat nau: «Pigaisindi totu custa cosa e no fatzais logu de mercau in sa domu de su Babu miu». ¹⁷Is iscientis si fiant arregordaus ki fiat scritu: S'apegu po sa domu tua esti papendiminci. ¹⁸Insandus is Judeus ìanta pigau a fueddai e d'ìanta nau: «Cali sinnu si donas ki tui podis fai cosas de-i custa manera?». ¹⁹E Gesùs d'iat arrespùndiu: «Sçusceindi custu tempru e deu in tres diis ndi du torru a pesai». ²⁰Insandus is Judeus d'ìanta nau: «Custu tempru d'anti fatu in corantases annus e tui ndi du torras a pesai in tres diis?». ²¹Ma issu fiat kistionendi de su tempru de su corpus suu. ²²E aici, candu si fiat torrau a pesai de is mortus, is iscientis suus si fiant arregordaus ki iat nau custa cosa, e ìanta crètiu a sa Scriidura e a is fueddus ki iat nau Gesùs. 
²³In s'interis fiat in Gerusalemi po sa Pasca, e genti meda, in sa dura de sa festa, biendi is sinnus ki fiat fendi, ìanta crètiu in su nòmini suu. ²⁴Perou Gesùs no dus teniat fidaus ca issu connosciat beni a totus ²⁵e no teniat abisonju ki calincunu di donessit tistimonju a pitzu de un'atru, ca issu sciiat su ki nc'est a intru de donnya òmini.


^3:1Intr''e is fariseus s'agatat un'òmini ki di naranta Nicodemu, unu capu de is Judeus. ²Issu fiat andau a nde Gesùs, a de noti, e d'iat nau: «Rabì, nosu scieus ki tui ses unu maistu bènniu de Deus; difatis nisçunus podit fai is sinnus ki fais tui, ki Deus no esti cun issu». ³D'iat arrespùndiu: «In beridadi, in beridadi ti nau, ki unu no tòrrat a nasci, no podit biri s'arrennu de Deus». ⁴D'iat nau Nicodemu: «Ma un'òmini, comenti podit nasci sendi beçu? Podit intrai forsis una segundu borta in is intrànnias de sa mama e torrai a nasci?». ⁵E Gesùs d'iat arrespùndiu: «In beridadi, in beridadi ti nau, ki unu no nasci de akua e de Spìridu, no podit intrai in s'arrennu de Deus. ⁶Su ki esti nasçu de sa carri esti carri e su ki esti nasçu de su Spìridu esti Spìridu. ⁷No ti depis spantai candu ti nau: depeis torrai a nasci. ⁸Su bentu sùlat aundi bolit e tui nd'intendis sa boxi, ma no-i scis de aundi nd'esti benendi e aundi est andendi: est acetotu po kini esti nasçu de su Spìridu». ⁹D'iat nau Nicodemu: «Comenti podit sutzedi totu custu?». ¹⁰D'iat arrespùndiu Gesùs: «Tui ses maistu in Israeli e no-i scis custas cosas? ¹¹In beridadi, in beridadi ti nau, nosu fueddaus de su ki scieus e tistimonjaus su ki eus biu, ma bosatrus no arriceis su tistimonju nostu. ¹²Ma ki, candu s'apu fueddau de cosas de sa terra, no eis crètiu, comenti eis a crei candu s'ap'a fueddai de cosas de su celu? ¹³E puru nisçunu est artziau mai a su celu foras de su Fillu de s'òmini ki esti calau de su celu. ¹⁴Aici comenti Mosè nd'iat artziau su serpi in s'arètigu, aici tòcat ki siat artziau su Fillu de s'òmini, ¹⁵de manera ki donnyunu ki creit in issu tengat vida po sempri». 
¹⁶Difatis Deus at stimau aici tanti su mundu ki d'at donau su Fillu suu unigènidu, de manera ki donnyunu ki creit in issu no si morjat, ma tengat sa vida po sempri. ¹⁷Deus no at imbiau su Fillu in su mundu po jugiai su mundu, ma po ki su mundu si sarvit po mori de issu. ¹⁸Kini creit in issu no esti cundennau; ma kini no creit esti stètiu cundennau jai, ca no at crètiu in su nòmini de s'unigènidu Fillu de Deus. ¹⁹E s'arrexoni esti custa: sa luxi esti bènnia in su mundu, ma is òminis anti preferju su scurigori a sa luxi, ca is obras insoru fìanta malas. ²⁰Difatis kini fai su mali, tìrriat sa luxi e no benit a sa luxi de manera ki no sìanta scoviadas is obras suas. ²¹Ma kini manìjat sa beridadi ndi benit a sa luxi, de manera ki ndi bessat a craru ki is obras suas das at fatas in Deus. 
²²A pustis de custas cosas, Gesùs fiat andau cun is iscientis suus in s'arrejoni de sa Judea; e ingunis fiat abarrau cun issus, e batiat. ²³Juanni puru batiat a Ennòn, acanta de Salìm, ca ingunis nci fiat akua meda; e sa genti andat a si fai batiai. ²⁴Difatis a Juanni no d'ìanta impresonau ancoras. ²⁵Fiat nasça una kistioni intr''e is iscientis de Juanni e unu Judeu, a pitzu de s'acrisoladura (sa prugadura de is pecaus). ²⁶Duncas fiant andaus a nde Juanni e d'ìanta nau: «Rabì, su ki fiat cun tui a s'atra parti de su Jordanu, su ki d'as donau tistimonju, esti batiendi e totus currint a nde issu». ²⁷Juanni iat arrespùndiu: «Nisçunus si ndi podit pigai cosa ki no d'at donau su celu. ²⁸Bosatrus mi seis tistimonjus de su ki apu nau: No seu deu su Messia, ma a mei m'anti imbiau a primu de issu. ²⁹Kini gòsat sa sposa esti su sposu; ma s'amigu de su sposu, ki est acanta e d'ascùrtat, si ndi prèxat intendendi sa boxi de su sposu. Imoi custu prexu miu esti lòmpiu. ³⁰Issu depit cresci e deu imbeças mi depu impiticai. ³¹Kini benit de s'artu est a pitzus de totus; ma kini benit de sa terra, fait parti de sa terra e fuèddat de sa terra. Kini benit de su celu est a pitzus de totus. ³²Issu amòstat su ki at biu e intèndiu, e puru nisçunus arricit su tistimonju suu; ³³kini perou nd'arricit su tistimonju, tistimonja ki Deus esti beridadosu. ³⁴Difatis su ki Deus at imbiau nàrat is fueddus de Deus e dònat su Spìridu ken''e mesura. ³⁵Su Babu stìmat su Fillu e in manu d'at donau donnya cosa. ³⁶Kini crei in su Fillu at a tenni sa vida po sempri; kini no obedessit a su Fillu no at a biri sa vida, e s'arrennegu de Deus est a pitzus de issu».