A innui traballu nc'est un'arrelloju 'e linna totu pintau. Nci bivit unu pilloneddu ki a 'onnya ora si ponit a cantai. Tenit boxi bella e kinikisiat du podit ascurtai. Esti bellixeddu meda, fait abarrai a buca obreta cumenti ndi bessit de sa fentanedda, ma a lestru a intru nci torrat a intrai. 

  In cussa domixedda pàpat e bùfat e a intr' 'e un'ora si podit pasiai. Nci bessit puru, ma a s'ora justa depit torrai. Su meri cosa sua ki est su Tempus, in d-un'arratu nci du podit bogai e kentz' 'e traballu si podit agatai. Est traballadori e puru pretzisu.
 
  Su meri du sfrùtat e no du dònat is fèrias, su pilloneddu est mesu stasiu. Intendit in foras un'ària callenti, e fac' 'e mari iat a bolli andai. A su mancu a su noti s'iat a bolli frimai. 

  Su Tempus est unu procu, 'olit sceti guadanjai, a 'onnya ora si ponit a papai. Est prenu de fillus, burdus e legìtimus. Sceti a issu e totu scit pensai. 

  Cussu pilloneddu si d'est fatu a scravu e d'at atratu cun d-una traitoria. Iat prenu unu lacu de brèminis e lori e cussa criadura nc'est arruta in prenu. A pustis d'at nau: " 'Olis traballai? Deu 'onnya di' ti dongu a papai".
 
  Is oras girendi in cuss'arrelloju una di' si frìmant e àndant a nke su procu. "Nosu seus is oras, tui si connoscis, ma imoi is contus cun tui 'oleus fai. O fais cun nosu cumenti si spètat o puru nosu de innoi si nd'andaus. Seus arruinadas, no s'as ollau mai e seus sempri morendi de sonnu. Tui ses grassu e nosu lanjas lanjas, imoi bàstat, a tui totu t'est paris ma seus nosu ki depeus girai. Tui ses stoiau cument' 'e unu procu e no fais atru ke dromiri e papai. Fragas de atesu e no ti lìmpias mai". 

  A-i cussus fueddus su pilloneddu agàtat s'atrevimentu de si ponni in mesu. Pènsat de si ndi detai de sa fentanedda e nç'arruit a pitzus de sa skina 'e su procu. Impari a is oras incumèntzat totu a du spitzulai, in is pabaristas e a intr' 'e is origas. 

  Po cantu proku, si ponit a prangi e di benit s'arrepentimentu. "Teneis arrexoni, no du fatzu prus. Si no 'oleis traballai fei cumenti 'oleis, baxeisindi, lassaimi' in paxi!" 

  Cussus sighiant a du trumentai. Issu si strantàxat cun is peis de a segus e a boxi arta dus tzèrriat a conca: "Foras de innoi, no si 'ollu biri prus!" 

  Is oras, imoi, cun su pilloneddu, un'atru traballu àndant a si circai. 

  Camìnant e camìnant finsas a mericeddu e stracus si frìmant in s'oru 'e s'arruga. 

  Sa bona sorti at bòfiu ki in cussu momentu unu burricu scapessit de traballai. 

  Cumenti du binti passendi cun su carru, cun d-unu sàrtidu nci àrtziant a pitzus. Du còntanta de su procu e fùrrianta cun issu. 

  S'incrasi a menjanu, candu su burricu est prontu po andai a traballai, is oras cun issu incumèntzanta sa di'. Su pilloni càntat allirgu e fieru ca imoi diaderus si podit pasiai.