No ndi lèssisti studai sa pampa
fradi, no lèssisti ki sa sciringa de s'infadu
ti ndi sùspat su licori de luxi,
soli de atonju ki adàsiu imbèçat.

No lèssisti ki su pruini de su cinixu
ti suterrit
e ki su steddu luxenti
si furrit in craboni nieddu.

No lèssisti ki sa linna fragosa
de is padentis, cresça a serru,
agradessat su fogadoni de su sacrifìtziu.

Fai ki su steddu aillargu e fridu
sprèndat poderosamenti,
scurpiddu
in sa luxi e in su fogu
cun su scrafeddu de su sùlidu.

Siat una stedda fitiana,
donaddi àlidu cument'a unu bentu
finsas a candu un'ùrtimu àstula de amori
in s'abetu ki una cincidda
alluat linna noa de vida.