De donnya parti lòmpinti boxis
e su mundu ndi sònat.
Su poderi indimoniau de siendas
parit ki binçat in donnya logu:
ma in medas biddas furisteras
sa genti morit de fàmini
e in is domus nostas
moreus spramaus, arricus e alluaus.

A mei mi tòcat...

A nosu si tòcat
totus impari
a s'intupai e a fai is isproradoris
po apubai in su mundu de donnya di'
is arrastus e is sinnalis
ki oi funt avilius e sbregungius
e ki ant a torrai a fueddai.

Si tòcat a forrogonai
in mesu 'e su cinixu
po circai su farifari;
si tòcat a scrucullai
sa pispisalla e is pimpirinas.

Si boçat kini bolit,
nosu totus impari
sigheus a spriculai
ca nci funt àstulas
ki bòganta sempri linna noa.