Ita d'ap'a nai a filla mia
ki at'a tenni bint'annus
in su Duamilla.

Ita d'ap'a nai
a pustis ki eus abruxau
padentis e cràkiris
a pustis ki eus alluau
mitzas e arrius
a pustis ki eus acaddotzau
pranus e montis
a pustis ki eus strupiau
costeras e marinas
a pustis ki eus incravau
matas e bèstias.

A filla mia d'ap'a nai
a no si fai imboddicai
cument'a nosu
ki eus donau a fidu
su mundu nostu
a is lutziferrus de sa kìmiga e de s'àtomu.

Nosu si d'eus donau
nosu vìtimas buginus e còmplicis.

A filla mia d'ap'a nai
ca no est prus tempus
de passièntzia.

"Torradindi a pigai sa terra tua
e perdona a su tempus nostu
ki t'at lassau
in eredidadi
muntronaxus e bombas".