O fradis e sorris de logu stranju
o fradis e sorris
a pilus de trigu ingraniu
a ogus de celu e de mari
bosatrus nd'eis sçorrocau su Muru.

Imoi nosu ndi depeus sçusçai
is murus prus grais, is murus de aintru:
is murus de s'egoismu e de s'indiferèntzia,
de su poderi indimoniau
de siendas e de òminis.

O sorris e fradis de logu stranju
no si fatzeis imbodicai
cument''e a nosu
arricus de nonnois e de bebellus
e pòburus de umanidadi e de cuncòrdia.

Domandai libertadi e su justu
pretendei paridadi e afradiamentu
ma no si fatzeis trogollai
de sa burrumballa indorada
de is carramatzinas alluadas.

Si podeus ajudai a pari.
Is murus ki bosatrus nd'eis sçorrocau
e is ki nosu apunteddaus
in domu nosta
no sèrbinti prus a nemus:
imbenteussi' cresuris noas,
cresuris de froris.