Cantus fueddus, cantus çaçarras
ma no si ndi benit mai dolori a is barras?
Teneis pròpiu una bella fac''e sola
e is ogus ke a unu pisci fatu a cassola.

Po kistionai de tres o cuatru sçollòrius
narais una surr''e fueddus ken''e fundòrius,
cirkendi de stronai sa conca a sa genti,
de di segai su bìddiu, sa matza e sa brenti.

Spaperotendi cun sa punt''e is carcanjus
si ndi bèssinti fueddus istranjus
ki mancu bosatrus ndi scieis su sentidu
e su ki ndi bessit a pillu est totu sbuidu.

Furriendi fueddus, arrogu po arrogu,
ke tankeddus de merda coendi in su fogu,
s'imbuscinais in su ludu de su disatinu
ken''e nai pani a su pani e binu a su binu.

Seis bonus sceti a bendi fueddus tuvudus
po fai benni a nosu apaliaus e currudus,
po donnya pinnica imbentais una teoria
ki atru no esti ki mala bravanteria.

Ma sigheis puru a kistionai in italianu
e in su sardu no nci da pongheis sa manu,
su sardu no est fatu po manus de sennoris
ca esti lìngua de messayus e de pastoris.

Imoi eis nau ki teneis un'abisonju,
a ki si bengat su dolori 'e scendionju,
de fai unu sardu ufitziali, artu e pretzisu,
ki a nosu s'at'a fai cagai sceti de s'arrisu.

Bogandi is manus de sa lìngua mia stimada,
ki jai un'atra borta tui mi d'as-i furada,
cun passièntzia mi da seu torrada a incunjai
e pròpiu imoi mi da bolis torrai a furai?

A totu is sardus nd'ìast a bolli furai
una lìngua ki no as mai bòfiu amparai,
as sempri nau ki fiat lìngua 'e bassineris
ca nc'est pagu cosa de murigai po is arruseris.

No est mai stètia sa lingua 'e su poderi
e imoi nd'ìasta bolli essi su meri,
po fai su ki fais cun s'italianu:
deu su serbidori e tui su soberanu.

Bolis su sardu? Poni in sa cadira su paneri,
stùdia e circa de no fai s'afroddieri,
e amostasi' sa boluntadi tua de imparai
sa lìngua ki imoi iast a bolli apoderai.

Ma finsas a candu no d'as a sciri fueddai
tenis axiru a ndi da bolli assartillai,
est in sardu ki deu mi pongu a sonnai
e is bisus mius no mi dus podis furai.