Su jogu de su barrallicu est unu jogu de is festas de sa Paskixedda, de s'acabu e de su cumentzu de s'annu. Su barrallicu est una bardufuledda ki si fait furriai cun is didus, tenit cuatru facis e casi sempri esti fata de linna, ma podit essi fata a sa lestra cun d-unu tapu de ortigu.

 

Donnya jogadori depit ponni una nuxedda (o una nuxi o su ki eus detzìdiu de jogai) in d-unu pratixeddu. Is jogadoris, a busçardu, fàinti furriai su barrallicu:

• ki bessit sa T = totu, su jogadori pìgat totu su ki s'agàtat in su pratu e totu is jogadoris dèpinti torrai a ponni una nuxedda a peròmini;
• ki bessit sa P = poni, su jogadori depit ponni una nuxedda in su pratu;
• ki bessit sa M = mesu, su jogadori pìgat sa metadi de su ki s'agàtat in su pratu;
• ki bessit sa N = nudda, su jogadori no bincit e no perdit nudda

Bonas festas e bonu jogu a totus.