Su ki serbit (po ses personis) :

• 1 kilu de trillya de arroca (funti cussas birdatzas)
• 700 gramus de tomata frisca po bannya
• pani tratau o sìmbula fini
• 1 cibudda
• unus cantu de follas de perdusèmini
• 2 tìtulas de allu
• 1 decìlitru de ollu de olia
• ollu po friri
• sali
  

Aprontai sa pitanza

Strecaus donnya tomata de manera ki perdat s'akua e su sèmini. Ki boleus, das podeus spilloncai puru. Aminudaus sa cibudda, s'allu e su perdusèmini e dus poneus a indorai in d-unu tianu cun s'ollu de olia callenti. Açungeus sa tomata e da feus coi finsas a fai callai sa bannya.

Smatzaus su pisci e ndi di bogaus sa scarta; ki sa trillya est frisca frisca no teneus abisonju de da smatzai ca no tenit feli, su figau est bonu e sa matza no est bruta.
Sçacuau e asçutau su pisci, d'insimbulaus e du poneus a friri in d-una sartània cun ollu insaboriau cun d-una tìtula de allu.
Acabau de friri, poneus sa trillya in d-unu pratu de serbiri e nci di ghetaus a pitzu sa bannya callenti. Custa pitantza da podeus fai puru cun atras calidadis de pisci bonu po friri (sarranya, vaca, etc.)

Po su binu cunsillaus unu binu biancu ke a su Nuragus o su Vermentinu, o unu binu arrubieddu ke a su Carinnyanu de su Surcis.