Su ki serbit (po ses personis) : 

• 1 kilu de prupa de sirboni
• 3 tìtulas de allu
• unus cantu de follas de perdusèmini
• su scroxu de un'aranju
• 1 decìlitru de ollu de olia
• 1 cibudda
• 1 litru de binu biancu
• 2 tassas de axedu
• 1 tassa de filu 'e ferru
• sali e pibireddu

Aprontaus sa pitantza 

Poneus sa prupa de su sirboni in akua frida e axedu po di fai perdi su sabori aresti. Ki su sirboni fiat pitikeddu, insandus abàstat a du lassai po duas oras sceti, ki imbecis fiat mannu e mascu, insandus tòcat a du lassai a su mancu po doxi oras.  

Feus buddiri sa petza po cuìndixi minutus in akua salia, boghendindi donnya intanti sa spuma; a s'acabu bogaus sa petza de s'akua e da lassaus sfridai.

 

Segaus sa petza a dadus. Poneus is arrogus de petza e sa cipudda trisinada in d-unu tianu cun ollu callenti e dus feus arrubiai. Ghetaus unu pagu de sali e de pibireddu.

Candu is arrogus de petza e sa cibudda si funt arrubiaus beni, açungeus su binu e du lassaus buddiri a fogu basçu finsas a du fai callai. A pustis açungeus s'allu e su perdusèmini trisinaus, su scroxu de un'aranju segau a fitixeddas, su filu 'e ferru. 

Studaus su fogu candu su filu 'e ferru esti svaporau totu e serbeus sa petza callenti.

Sa calidadi de binu ki cunsillaus esti su Cannonau nieddu.