Su matzamurru est forsis s'arritzeta prus pòbora ki nci teneus in Sardinnya. In Casteddu, prus ke atru de s'ùrtima gherra finsas a is annus de '50/'60, po sa genti pòbora fiat s'ùniga manera po arrennesci a papai calincuna cosa o po acabai su pani abarrau. Su matzamurru est una supa fata cun bannya de tomata e pani tostau. 
S'arritzeta ki ligeis innoi est una bariedadi "arrica".

Su ki serbit (po ses personis) : 

• 1 kilu de pani tostau (modditzosu, civraxu o atru pani sardu)
• mesu litru de lati
• 500 gramus de tomata frisca
• 2 tìtulas de allu
• unus cantu de follas de perdusèmini
• 1 cibudda
• 2 follas de afàbica
• ollu de olia
• 1 tomata sicada
• 150 gramus de casu de brebei

Aprontai sa pitantza 

In d-unu tianu poneus a callentai unu pagu de ollu de olia, nci ghetaus sa cibudda, s'allu, e su perdusèmini trisinaus e dus feus imbrundai. A pustis açungeus sa tomata aminudada, ken''e sèminis ni pilloncu, s'afàbica e sa tomata sicada. Feus coi sa bannya a fogu basçu e no da feus callai tropu. Açungeus su sali ki abisònjat.

Segaus su pani a fitas. Ki su pani est friscu du podeus ponni in su forru, a primu de du segai a fitas, po du fai sicai unu pagu, ma ken''e d'abruskiai. Poneus is fitas de pani  in d-una cardiga po das fai abruskiai e a pustis das poneus a amoddiai in su lati callenti. Una borta amoddiadas, das feus stiddiai.

Pigaus unu tianu de coi in su forru, feus un'arrasu de fitas de pani, nci di ghetaus a pitzu unu pagu de casu tratau e unu pagu de bannya. Torraus a fai un'atru arrasu de pani, de casu e de bannya, e sigheus aici finsas a preni su tianu. Poneus su tianu in su forru, prus o mancu po unu cuartu de ora a temperadura mediana.

Su binu cunsillau po custa pitantza est sa Mònica.