Sa primu cosa de pigai in cunsideru candu boleus fai su prupu buddiu est sa de du sçoberai beni, ca de calidadis de prupu nci nd'at medas.

A su mercau prus ke atru si nd'agàtant de duas calidadis: su prupu a duas carreras e su prupu judeu.

Su prupu a duas carreras est una calidadi de prupu ki tenit is cambas grussas e cun duas fileras de bentosas, est moddi, est saboriu i est prus fàtzili a du coi. Po fai su prupu a insalada custu est su prupu ki depeus sçoberai.

S'atra calidadi de prupu ki eus nau, su judeu, tenit is cambas finixeddas e cun d-una filera sceti de bentosas, est tostadeddu e corriatzu, no est saboriu meda, e fatu a buddiu no bessit bonu. Mancai, candu est friscu friscu, est bonu po du fai cun is macarronis.

Su ki serbit (po ses personis) : 

• 1 kilu de prupu a duas carreras 
  (donnya prupu depit essi a su mancus de 300 gramus)
• ollu de olia
• 2 o 3 tìtulas de allu
• unus cantu de follas de perdusèmini
• axedu biancu (po kini du bolit ponni)
• sali

Aprontai sa pitantza 

A primu de dus coi, is prupus bòlinti smatzaus e sçakuaus. Ki is prupus funti friscus, dus poneus a buddiri in akua salia po una pariga de minutus po dus fai amoddiai. Bogaus de s'akua, dus poneus a buddiri in d-un'atra pinjara, a fogu artu, po trinta minutus. Ki is prupus fiant in sa ghiacera, insandus bàstat a dus fai buddiri in d-una pinjara sceti po 30 minutus ca funti jai amoddiaus de sa ghiaçadura. 
Sturau su fogu, lassaus sfridai in s'akua. Una borta sfridada s'akua e bogaus is prupus, dus seghaus a fitixeddas o a tankeddeddus.
Poneus totu in d-unu pratu e cundeus cun ollu, cun allu e perdusèmini trisinaus, e a prexeri poneus axedu. Lassaus arreposai a su mancu po un'ora a primu de du papai.

Is binus cunsillaus funti su Nuragus e su Vermentinu de Sardinnya.