|
Is panixeddas, o animeddas, funti bobois ki si fàinti po sa
festa in onori de is mortus. A segunda de sa bidda sa festa da fàinti su 31 de
Ladàmini o su 2 de Donnyasantu, e in custa di' de festa is pipius àndanta de
domu in domu a dimandai custus bobois. De panixeddas nci ndi funti de duas
calidadis: sa de mèndula e sa de nuxi ki si presentaus innoi.
Su ki serbit po 12 personis:
-
unu kilu e mesu de nuxi
-
500 gramus de pabassa
-
12 gramus de cannada a pruini
-
mesa nuxi muscada tratada
-
30 gramus de matafalua turrada e tratada
-
30 gramus de scroxu de aranju sicau in su forru e tratau
-
unu kilu de farra
-
200 gramus de tzùcuru
-
2 dexìlitrus de saba de àxina
Aprontaus sa pitantza
Po fai s'arreprenu trisinaus su papu de sa nuxi e d'amesturaus cun sa
pabassa, cun d-unu pagu de matafalua, de cannada, de nuxi muscada
e de scroxu de aranju. Amesturaus beni açungendi unu pagu de farra
sfusta sa saba callenti e lassaus arreposai.
A un'atra parti amesturaus sa farra impari cun sa saba, su tzùcuru,
sa nuxi muscada, sa cannada, su scroxu de aranju, sa matafalua.
Cun d-unu tùturu tiraus sa cumossadura a sfolla e ndi feus arretallus
de forma tunda, de sa mannària de unu pratixeddu.
A tzentru de donnya forma nci poneus una bocixedda de arreprenu
ki imboddicaus cun sa sfolla de manera ki ndi bessat una fogatzedda tunda.
Lassaus arreposai is panixeddas cruas po una di' e a pustis das coeus
in su forru a fogu basçu.
|