www.sardu.net
Sa burrida
de Danieli Sanna

Sa burrida est una pitantza antiga meda ki fait parti de sa coxina de su connotu populari casteddayu.
 
Mancai sa simbillantza de su nòmini, sa burrida no tenit nudda de spartziri cun sa "buridda" ki est una spètzia de cassola de pisci ki faint in Ligùria.

Sa burrida est una manera de coxinai su gatu 'e mari, una genia de skualu piticu ki tenit sa peddi tostada e arrespinosa; candu esti matukeddu, custu pisci est longu prus o mancu mesu metru. 

gatu 'e mari

In s'antigu sa peddi de su gatu 'e mari da manijanta ke a paperi de birdi, e serbiat po allisai e allustriai arroba de linna, de metallu o de perda. 

Su gatu 'e mari est traballosu a du scroxai, duncas candu andaus a du comporai cumbenit a du pigai jai scroxau. Ma sa cosa prus traballosa de su gatu 'e mari est un'atra: arrennesci a du coxinai de manera ki siat bonu a papai. 

Sa burrida, ki nànta ki siat de bennidura Sçardana o Feniça, esti forsis s'ùniga manera po du fait bonu deaderus: nasça ke pitantza pòbora, imoi benit serbia in is posadas prus famadas (e caras!) de Casteddu. 

Su ki serbit: 
  • 1 kilu de gatu 'e mari
  • 1 decìlitru de ollu de olia
  • 100 gramus de cibudda bianca
  • 1 o 2 tìtulas de allu
  • 50 gramus de papu de nuxi
  • mesu litru de axedu biancu o arrubieddu
  • sali

Aprontai sa pitantza 

Po primu cosa tòcat a aminudai sa cibudda, su figau de su gatu 'e mari, sa nuxi, s'allu.

Feus arrubiai sa cibudda in s'ollu callenti, açungeus su figau de su gatu 'e mari, lassaus coi po dus minutus, e a s'acabu açungeus s'axedu, sa nuxi e s'allu. Lassaus coi po atrus cincu minutus a fogu basçu, e a s'acabu sa bannya est aprontada.

Su gatu 'e mari bolit segau a tankeddus: donnya tankeddu depit essi longu prus o mancu cincu centìmetrus e is tankeddus a sa parti de sa conca bòlinti sperraus ca asinuncas funti tropu grussus. Poneus is tankeddus a coi in d-una pinjara cun akua salia buddendi. Candu s'akua tòrrat a buddiri, e sa prupa de su pisci mùdat colori, ndi studaus su fogu, ndi bogaus su pisci de s'akua e du poneus a sfridai. 

Una borta sfridau, poneus is tankeddus in d-unu tianu (mellus ki siat de còssiu), açungeus sa bannya callenti e du tupaus cun d-unu crobetori.

Lassaus arreposai sa burrida po 24 oras in logu friscu e ken''e da murigai.

Sa burrida si pàpat frida, a temperadura de ambienti, e podit essi stujada po unas cantu de diis. Ki da poneis in sa sfridadora podit abarrai bona po una cida, ma est mellus a nde da bogai a foras un'ora a primu de da papai.

Papendi sa burrida su mellus binu de bufai esti su Nuragus, ma bàndat beni acetotu unu Vermentinu forti. 
Danieli Sanna, Làmpadas 2003