Is festas moviditzas
In su calendàriu s'agàtant unus cantu de festas ki donnya annu bèssint in
d-una di' diferenti. S'arrexoni de-i custu fatu esti ki custas festas funt
acapiadas a sa di' de Pasca Manna ki bessit a segunda de sa luna.
Comenti mùdat sa di' de Pasca Manna
In su primu Concìliu de Nicea (annu 325) sa Crèsia iat detzìdiu ki sa di' de
Pasca Manna iat'essi stètia su domìnigu a pustis de sa primu luna prena de su
beranu. Po custa arrexoni sa di' de Pasca Manna podit andai de su 22 de Martzu a
su 25 de Abrili. Difatis, ki su 21 de Martzu (sa primu di' de su beranu) esti de
luna prena i esti sàbudu, Pasca Manna bessit su 22 de Martzu; candu su 20 de
Martzu esti de luna prena, sa primu luna prena de su beranu esti su 18 de Abrili;
ki custa di' esti domìnigu, intzandus Pasca Manna bessit su domìnigu a pustis,
est a nai su 25 de Abrili.
Festas acapiadas a sa Pasca Manna
Su mèrcuris de Cinixu esti 46 diis a primu de Pasca Manna e su domìnigu a
pustis esti su primu Domìnigu de Carèsima. A primu de su Cinixu bèninti is
festas de su Carrasçali: Jòbia Lardayolu, Domìnigu de Carrasçali e Martis
Lardayolu.
Su Sinnadroxu de Gesùs (jòbia) esti sa de 39 di' a pustis de Pasca Manna;
de su 1977 in Itàlia custa festa da fàinti su domìnigu a pustis, est a nai su
de 6 domìnigu a pustis de Pasca Manna. Su Spìridu Santu esti su de 7 domìnigu
a pustis de Pasca Manna. Sa Trinidadi esti su de 8 domìnigu a pustis de Pasca
Manna. Su Corpus Dòmini esti sa de 60 di' a pustis de Pasca Manna i esti de
jòbia, perou de su 1977 in Itàlia da fàinti su domìnigu a pustis, est a nai
su de 9 domìnigu a pustis de Pasca Manna.
Danieli Sanna, Idas 2004
|
Gennarju
Linu Talloru, ghitarreri famau, est traballendi jai de
diora po fai connosci sa mùsiga sarda in s'arretza...
