Sàbudu, su tresi de Làmpadas de su 2006, me in su jardinu de scola de bia Campània, asuta de is matas umbrosas, is pipius impari a is meistas de sa scola primària e a sa presèntzia de sa dirigidora, ant presentau su progetu Sardu seu – sa festa de su pani (1). Sa scola at aici dètzidiu de fai connosci a is pipius cumenti nascit su pani, cumenti du fadiant is ayayus nostus, a incarrerai de candu ndi messànt su trigu fintzas a sa cotura de su pani in su forru. Ant aici fatu unu traballu asuba de custus argumentus. Una di’ ant po fintzas fatu unu biaxi a postali a Ortacesus a ‘bi do-i est unu museu-laboratòriu po biri totu su manixu asuba de cumenti si fait su pani. A s’acabu ant fatu puru una spètzia de libureddu bellixeddu bellixeddu totu scritu in sardu cun is disinnyus de is pipius.

   Depeus nai ca a pustis ant provau is pipius puru cun is meistas e calincuna mama de bona boluntadi a du fai in scola. Po custa di’ is babus e is mamas ant aprontau cosa de papai ki est de su connotu nostu, fata perou cun farra. S’ingaunju puru fut de su connotu nostu. Ita totu no do-i fut! Mesas de pani de donnya calidadi: cocoi, civraxu, ladas o costeddas, pani carasau e pillunca; sartitzu, olia, malloreddus cun bannya e frègula. In prus du-i fìant drucis de donnya arratza: pani ‘e saba, pabassinus, pàrdulas e casketas (unu druci de su cabesusu). Totu cosa saborida e nodida, unu spantu e unu prexu po is ogus e po su scraxu puru, amostada de una manera ki si fadiat benni gana de si du-i afracai cument’ ‘e a canis asuba de un’ossu.

   Prima de incarrerai a papai, is meistas ant presentau in italianu unu contu bellixeddu asuba de cumenti si fut scobertu su fromentu, contau de is pipieddus, s’ant aici nau calincuna fràsia in sardu, pagus po nai sa beridadi. Depu nai cun grandu disprexeri e tristesa ca medas pipius parriant stranjus! Ant nau custas fràsias cument’’e a ki fessint nasçus in terramanna (o in sa Rinascenti cumenti acostumu a nai deu), e custu bolit nai sceti una cosa: no scint fueddai mancu un fueddu de sardu! ‘Ta bregunja! Ellus ki no podit ki essi di aici: in scola a is pipius dus fuèddant sceti in italianu, sa televisioni e s’arràdiu no trasmitit unu fueddu de sardu, is jorronalis a su pròpiu, in crèsia sa missa est in italianu e su catekismu puru, candu bàndat a jogai a palloni o in ludoteca o a su grest lassu a ‘osatrus intzertai ita lìngua manìxant.

   M’eis a nai ca a su mancu in domu, ca est su logu a’bi, prus de totu, s’impàrat sa lìngua, s’at a fueddai su sardu… cessu mama mia ti arrori! Su prus de is mamas, babus e ayayus no fuèddant in sardu a is fillus e nebodis, ca pènsant ancora, cosa de no crei, ca fait dannu a s’imparu de s’italianu... Is meistas de seguru, connoscendiddas, ant fatu su mellus ki podiant, e de prus puru (e dis depeus nai gràtzias), ma is oras asuba de sa lìngua e sa curtura sarda funt pagus, issas puru nàrant ca calincuna borta, in cussas oras depint fueddai in italianu po si fai a cumprendi (mancai deu pensit ki siat unu sbàlliu mannu ca una calisisiat lìngua s’impàrat fueddendu e fadendidda fueddai. Miga nosu, po nai, s’italianu d’eus imparau ascurtendu e kistionendu s’ingresu o su cinesu).

   Sa presentada is meistas d’ant fata, su prus, in italianu, a parti calincuna meista ki at spricau calincuna cosa in sardu. A mei, po nai sa beridadi, a unu certu puntu mi parriat de m’agatai in calincuna tzitadi de terramanna! Cun grandu prexeri apu biu ca is meistas, su contu presentau de is pipius, d’ant amostau in d-una manera bellixedda me in follus de paperi mannus mannus, cumenti ki fessint fumixeddus, totus disinnyaus e pintaus, scritus in sardu de is pipius e totu.

   A pustis ant fatu puru su libureddu in sardu spantosu meda. Du-i fiat puru su sìndigu nou, ki at saludau mannus e piticus, presentendusidda incapas po sa primu borta, in d-unu adòbiu mannu de genti. Aici in s’interis ki una pariga de Sardaresus, àbilis meda, s’ant amostau cumenti si fadiat su cocoi, sigumenti teniaus fàmini, in mesu de custu fragu bellu de festa eus incarrerau a papai. M’est beniu de pensai, totu cunsiderau, ca prus ke tzèrriai custu progetu Sardu seu, deu d’iap ai tzèrriau Papu deu… A pustis de unus cantu ballus sardus, eus saludau meistas, amigus e bixinus e si ndi seus torraus pràndius a domu nosta.

(1) promòviu de s’ Arrejoni Sarda gràtzias a sa lei asuba de sa Lìngua e sa Curtura Sarda

G.Pàulu Pisu, Làmpadas 2006