Scrii a www.sardu.net
 

Poni www.sardu.net
a pàgina de cumentzu
Beni bènniu ùrtimu ajorronamentu: 01/10/06
Domu| Arrecensiduras| Artìculus| Calendàriu| Cantadas| Coxina| Fueddàrius| Fumixeddus| Ideas| Literadura| Mexina| Naturalesa| Presentadas| Scèntzia|
 Artìculus

Bilinguismu in Sardinnya e in s'universidadi puru
Dexi cidas de Lìngua Sarda
Grafia Sarda
Ita est su Bilinguismu
Lìngua sarda uniatzada: una kistioni farsa
Nci funti fueddus e fueddus
Sa Di' de sa Sardinnya est donnya di'
Sa festa de su pani
Sa scoberta de sa Sardinnya
Sàrdara, Bidda mia
Sardu: cosa meda de incrarai
Su Sardu in s'arretza
Su Sardu po su Benidori
Tiatru e Lìngua Sarda
Toponomàstiga de mari
 
 

artìculu de Arricardu Serreli
Toponomàstiga de mari

 

   Sa lìngua sarda, ke is atras lìnguas, est una parti manna de sa curtura de su pòpulu, est unu scusorju aundi agataus fueddus ki si fàinti sciri calincuna cosa de sa stòria nosta, partendi de is fueddus pre-latinus, a pustis is nou-latinus, fintzas a is castillianus e is cadelanus.

   Is nòminis de logu funt a bortas fueddus ki umperaus oindi’ ancoras, ki tenint unu sentidu, e po atrus inveças su sentidu d’eus pèrdiu: funt arrastus de is tempus passaus. Is studiaus cìrcanta de dus spricai, mancai sa busca siat traballosa meda ca taliortas fueddus antigus (feniçus, nuraxesus, pre-nuraxesus, etc.) si funt amesturaus cun atrus e po-i custu tocat a donai atentzioni.

   Duncas, imoi sighendi sa ‘ia in s’oru ‘e mari inghitzaus unu biaxu castiendi is carteddus ki nci funti. Parteus de Solanas in castillianu bolit nai logus solianus, agoa agataus Cabu Boi (it. Capo bue) truessau bieus Portu sa ‘ruxi (it. Porto della croce) ki est una praya bella meda. A tres kilometrus de-i custa arribaus a sa praya de Campus (it. Campi) custu fueddu est unu sangunau puru e fortzis su nòmini est nasçu di aici. Innoi si ghetat s’arriu Foxi (it. Foce) ki du nanta puru Murredda. Imoi sa ‘ia si stèsiat de su mari e arribaus a s’ingruxada po Campulongu (it. Campolungo), un’atra praya, andaus a innantis conca a su portixeddu turìstigu e agataus sa Spiaggia del riso: custu nomini d’anti donau po s’arena ki parit arrosu.

   A pustis de su portu andaus a Cabu ‘e Crabonaxu, Capo Carbonara, custu fueddu benit de craboni (it. carbone) e crabonaxu in italianu carbonaio, su nòmini de su comunu de Villasimius a primu de sa metadi de su milliotoxentu fiat Crabonaxa e kistionendi in sardu abarrat Crabonaxa. Sa ‘ia acabat in d-una pratzixedda de innui podeus biri s’Isula de su Càvuru (it. Isola dei granchi) ki perou sballiendi d’anti bortau in Isola dei cavoli. Una faddina di aici d’anti fata puru in Gaddura bortendi Gulfu de li ranci (it. Golfo dei granchi) in Golfo Aranci. De sa pratzixedda calaus in sa cala ‘e Su forru (it. Il forno) innui agataus su ki abarrat de sa “cava Usai”, ki nci fintzas a is annus sessanta ndi boganta s’ingraniu.

   Torrendi agoa furriaus a sa praya de Portu juncu (it. Porto giunco) e a palas podeus biri su stàini Noteri. Andendi a innantis agataus sa praya de Simius ki est longa prus de unu kilometru e mesu; pigaus sa ‘ia in s’oru ‘e mari ki àrtziat fintzas a Costarrei (it. Costa del Re) po primu agataus punta Molentis (it. Asini) e calaus in sa praya pighendi s’arruga ki partit de su ponti de s’Arriu Trotu (it. Rio Storto “tortuoso”). Cust’arritzolu nascit in su monti Maçoni (it. Ghiozzo) ki est unu sangunau puru. Duncas a pustis bieus Cala ‘e Pira (it. Pera) a unus kilometru agataus Cala Sìntzias (it. Gengive); arribaus a sa praya de Santu Perdu (it. San Pietro) e a palas podeus biri montis e cucureddus comenti Bruncu Mont’Arbu (it. Cima monte bianco) ki tenit unu bellu matedu de ìlixi.

   Sighendi, lompeus a sa praya Cannisoni (it. Canneto) e acant’‘e sa ‘ia bieus su nuraxi Sa Domu ‘e s’orcu (it. La casa dell’orco). Costa Rei in prus de sa praya tenit acant’’e su mari unu stàini: Piscinarrei, innoi du-i funti bintidus menhir e a nord de Monti Nai (it. Monte ramo) agataus dus atrus logus arkiològicus: su nuraxi Scalas e Monti Crobu - cuili Piras (it. Monte Corvo - ovile Piras) innui nci funti cincuanta menhir. Truessau Cabu ferrau (it. Capo ferrato) lompeus a unu spantu de logu: cala Sa Figu (it. Il fico) e Portu ‘e s’ ìlixi (it. Porto del leccio). De innia podeus biri su stàini de Feraxi e su stàini de Colostrai, custu fueddu pre-latinu fortzis bènit de colostri (it. agrifoglio, in lìngua basca gorosti); a palas du-i esti su Monti Liuru (it. Monte alto e di bell’aspetto).

   Andaus faci a Santu Pìlimu (it. San Priamo) e lompeus a Murera (Muravera), fortzis italianu senape, mancai siat unu fueddu pagu connotu. Innoi dui est un’atra praya longa sa de Santu Juanni (it. San Giovanni), a unus cantu ‘e kilometrus nci funt is atras duas biddas: Bidd’‘e putzu (Villaputzu), (it. Paese del pozzo) e Santu Idu (it. San Vito). In su sartu de S. Idu podeus pigai s’arruga ki pesat a monti Narba (it. Malva) innui dui fiat una minera de prata; in su Sarrabus mineras dui fìanta atras, po nai, acant’’e Murera podeus andai a Bacu Arrodas (it. Valle delle Ruote) in jossu de Monti Nieddu Mannu (it. Monte Nero Grande). Torrendi agoa pigaus sa ‘ia po Castiadas (it. Sguardi “panorami”), e andendi prus addei de Olia Speciosa (it. Oliva, speciosa: bella de s’italianu antigu?) intraus in su rennu de su cerbu, innoi nci funti mitzas, cràkili e camineras: su Cràkili de s’akua callenti (it. La foresta dell’acqua calda) est unu spantu. Ki arroliaus ancoras, eus a scoberri logus de grandu bellesa ki tèninti nòminis antigus.

Arricardu Serreli, Arjolas 2006