arrecensidura de Amos Cardia

 

A Sarbadori Dedola du conosceus jai. Fiat su presidenti arrejonali de su "Club Alpino Italiano", ki at imbentau su "Sentiero Sardegna", fendiddu passai in d-unu muntoni 'e logus tropu bellus, de Santa Teresa de Gaddura a Castiadas. A kini d'at caminau, e a kini at liju su libru ki at scritu e ki eus arrecensiu innoi e totu, Sentiero Europa, Sentiero italia, Sentiero Sardegna, du scit ita arratz''e traballu at fatu.

E imoi s'at torrau a spantai cun d-un'atra obra manna, su libru Toponomastica Sarda, ki si sprìcat su sentidu de duamila nòminis de logus de sa Sardinnya. No castiendi a sa linguìstiga sceti, ma a sa stòria, a sa jografia e a sa naturalesa de su logu. At traballau po annus de una manera oberta sempri a totu is iscubertas, ken''e sighiri is modas acadèmigas, e at scubertu cosa ki a primu no sciemus. Ma no si ndi bogu sa surprèndida, si lassu su prexeri de si du ligi bosatrus e totu po sa primu borta.

Diferentementi de su ki anti nau atrus buscadoris, Dedola nàrat e sprìcat cumenti su trintotu po centu de is nòminis de logu de totu sa Sardinnya ndi bèninti de lìnguas ki s'agatànt in Sardinnya a primu de su latinu. Cumenti ki siat sa kistioni, su traballu de Dedola srebiat meda, po adelantai sa busca scentìfiga ki fiat arriskendi de si frimai.
Ma Toponomastica Sarda tenit unu muntoni de atrus merescimentus puru, cumentzendi de su fatu ki Dedola no est un'acadèmigu, no est pagau donnya mesi po fai buscas e librus ke is professoris universidàrius. A issu no si d'at postu a fai nisçunus e d'at fatu totu de busçaca sua, i est unu sagrifìtziu mannu, ma d'at fatu su pròpiu, po stima de sa natzioni sarda e de sa scèntzia.

In prus, in sa forma ki tenit e totu, est unu fueddàriu beru, ki si podeus ponni in sa mucilla donnya borta ki giraus sa natzioni nosta e boleus sciri su sentidu de is logus ki passaus. Cos''e nai nci nd'iat'essi atra meda, ca su libru est mannu - 580 pàginas - ma, po sighiri sa kistioni, sa cosa mellus est a andai a is presentadas de su libru ki ant a fai. A kini de librus ndi manìjat pagus, d'at a parri caru ca còstat 40 € (francus nous), ma funti totus meresçus.

Amos Cardia