www.sardu.net - arrecensiduras

www.comitau.org esti su jassu de su Comitau Studiantis po sa Lìngua Sarda, un'assòtziu fatu po su prus de studiantis unibersidàrius ki stùdiant in Casteddu, ki si funt assotziaus dus annus fait po fai caminai su bilinguismu in Sardinnya. Su jassu est nasçu su 23 de mayu de ocannu e in pagu tempus esti bessiu un'arreferimentu po meda genti de totu is bariedadis de sa Sardinnya, jòvunus e mannus, studiantis e traballadoris, in Sardinnya e in totu su mundu.

Cumenti d'obereus, su ki si pìgat a primu esti sa bisura gràfiga: pagus coloris ma umperaus beni, scriidura pitica meda ma sempri crara. A dereta sa colunna ‘e s'ìndixi, in donnya pàgina, mentras totu su logu a manca esti po su cuntènnidu e/o po is fotografias. Anti postu una màngara de presentada de sa truma (Kini seus) e un'atra de presentada de totu su ki anti fatu finsas a imoi (Ita eus fatu), ki crakendi is traballus unu dus podit biri de manera prus funduda puru.

Sa parti prus manna esti po sa didàtiga de su sardu, ki s'agàtat unu documentu simpli e craru a pitz'‘e sa grafia, est a nai a pitz'‘e sa manera de da scriri, unu cursu a puntadas ki pìgant a esempru sa vida sotziali de sa personi, unu fueddàriu de deximila fueddus fatu de issus e totu e una gramàtiga de sa lìngua sarda de centucincuanta pàginas, ki pìgat campidanesu, logudoresu e nugoresu. Su fueddàriu e sa gramàtiga funt a formau pdf (est a ani ki po dus oberri tòcat a tenni su programa Acrobat Reader) e fait a si dus scarrigai a donu. Su fueddàriu esti de su campidanesu a s'italianu, ma gràtzias a su butoni 'circa' fait a d'umperai a s'imbressi puru: nosu di poneus su fueddu italianu e issu si d'agàtat su sardu puru amostendisiddu in sa pròpiu arraya.

Cumenti ‘e ki no abastat, cumbìdant is ligidoris e is abisitadoris a pigai parti a su traballu po is noulogismus, po fai nasci de su sardu e totu is fueddus po is cosas modernas ki sa lìngua sarda no at acutu a d'agatai unu nòmini. Po cust'arrexoni ponint unas cant'‘e spricaduras de linguìstiga po cumenti fai is noulogismus in sa lìngua sarda (Noulogismus e Fàbriga noulogismus), e donnya duus mesis imprèntant una filera de fueddus italianus e ingresus ki in sardu no s'agàtanta: duus mesis a pustis imprèntant is mellus noulogismus intr'‘e totu is ki di funti lòmpius. Donnya borta làssant imprentaus in d-un'arcivu (Arcivu noulogismus) is fueddus de is mesis passaus puru, e aici a pagu a pagu esti bessendindi unu fueddàriu modernu ki no ndi podeus fai de mancu.

Un'atra parti esti po s'imparamentu de su sardu in sa scola (Scola) e innoi puru bieus dogumentus de linguìstiga impari a sperièntzias e a consillus pràtigus: intrebistas a maistas, librus po pipias e pipius e aici nendi. Bona meda puru esti sa pàgina ‘e is acàpius (Acàpius) ki s'agàtanta sinnaladuras de jassus e portalis de lìnguas minoridàrias de s'Itàlia, de cursus de lìngua sarda, de assòtzius intrenatzionalis po is lìnguas minoridàrias, de assòtzius intrenatzionalis de is famìlias bilìnguas e aici nendi.

Nç'at atra cosa puru, ma a custu tretu esti mellus a ki da scuberjais bosatrus e totu e …