«Arrispetaisi' po su ki seus,
no si domandeis de cambiai ca no nç'arrennesceus,
seus aici, no seus ni mellus ni peus,
ogualis a nosu in donnya cosa ki fadeus …»
Po s'annu nou is Balentia, una de is trumas sardas de mùsiga hip hop
prus connotas, in Sardinnya e in Continenti puru, s'anti fatu is
istrinas cun d-unu ciddi' nou, 'Nos'e totu', ki du esti sa cantzoni ki
eus postu a su cumentzu. Càntant in sardu e in italianu e a contu fatu
funti casi dex'annus fendi connosci s'hip hop in Sardinnya e, gràtzias
a su traballu musigali de issus e totu, fendi connosci sa Sardinnya in
su Mundu.
No si podìanta presentai de manera prus crara:
«Su naturali nostu prus
mannu est a umperai sa lìngua sarda in is cantzonis, ki fuèddanta de
cosa polìtiga e de cosa sotziali, ma no est cosa gavaça, ca nç'at sa
bisura crara de su mundu a nca biveus. Sa spètzia ki proponeus est unu
hip hop
cràssigu, cantau in lìngua
sarda e in italianu, amesturau meda cun su Funk e cun s'Iletròniga. Sa
tenta nosta est a arrelatai sa gana de comunigadura de s'
hip hop a su
poderi e a s'atumbu de is beat grassus, kena de grisai is sonus
sintètigus.Ma su prus de interessu est a fai cuntzertus, a nca arrennesceus a
espressai totu su ki teneus a intru. De su 1996 eus fatu spetàgulus in
Milanu, in Grossetu (in sa finali de su cuncursu
Indipendenti
'96) i eus fatu unu giru sardu de smeru mannu e longu meda. In su
1998 eus pigau parti a una espressada europea ki di naranta
The
Rap Feeling, fata in Stugarda de su 22 de Abrili a su 1 de Mayu de
su 1998. In su 2001 s'anti premiau in su de tresi
Festival della
Canzone Sarda a mellus propònnida annoadora de sa scena musicali
sarda. In is annus eus sonau a canta de artistas mannus in sa scena
natzionali e intranatzionali, ke
Casino Royale, Neffa, DJ Gruff, Piotta,
Orishas, Lou X e aici nendi».
Custu ùrtimu discu cunfìrmat totu su bonu ki anti fatu a primu, ma est
unu spantu mannu puru, ca esti siat unu ciddi' de ascurtai a mùsiga
(funti dexaseti cantzonis) siat unu CD-ROM ki tenit una parti de castiai
in sa computadora. Innoi nci funti totu is iscritus de is cantzonis, una
skeda biogràfiga de sa truma e unu bidu de una cantzoni puru (Alti e
Bassi).
Totu custa parti informàtiga (bilìngua sardu - italianu) si d'at
coidada
http://www.arpexperiment.org
mentras po sa lìngua sarda at ajudau
http://www.comitau.org,
e toteduus anti donau una calidadi bona meda. Tenint unu jassu puru,
http://www.balentia.com,
mancu a du nai bilingu sardu – italianu custu e totu.
Aleni e su contu de unu nau de trigu