|
Custu libru d'anti pensau e d'anti fatu po is pipius e po is pipias, po dis
contai su caminu ki fait unu nau de trigu finsas a bessiri pani. Funti binti
pàginas a forma 'e A4, e is versus de su contu funti totus a arrima basada,
scritus a mannu a mannu po dus podi ligi e po dus podi imparai finsas is pipius
prus piticus. Funt acorraus una pariga 'e versus in dònnia pàgina, e a suta
nci funt is pinturas ki sprìcant e abalòranta su ki nàrat su versu. Is versus
funti lestrus, deretus, crarus, ken''e pispisalla, ca est justu ki siant aici;
is disinnus funti dilicaus ma sempri crarus acetotu, beni cumbinaus in totu is
partis, ki is pipius nci podint agatai su ki nàrat su versu, ma cosa in prus
puru. Est unu libru ki fueddus e pinturas funt is unus po is atras, ca
s'afòrtiant a pari po scallentai is ligidoris, piticus o mannus ki sìanta. No
ndi bessit unu libru sceti, no ndi bessit un'imbala-pipius o una poesia sceti,
ndi bessit unu cuadru ki s'amànniat a pàgina a pustis 'e pàgina.
Is fueddus dus at scritus Gina Farci, maista in d-una scola 'e pipiesa de
Cuartu S. Aleni, e is pinturas das at fatas Teresa Tinti, ki bivit in Cuartu
issa puru, ki iat fatu atrus librus e atrus disinnus po pipius jai, ki d'anti
connota e apretziada in Continenti puru. S'introdusidura d'at fata Antoni
Lèpori, scriidori de fueddàrius e de gramàtigas de campidanesu e no-i sceti,
ki si còntat su cunsideru po su sardu ki nci fiat in is iscolas corant'annus
fait, e si sprìcat su cunsideru ki nc'est imoi, su ki funti fendi is maistas e
su ki tòcat a sighit a fai. Su libru esti totu in campidanesu, sa presentada e
s'introdusidura puru, totu scritu beni ken''e italianismus e a grafia autònoma,
est a nai ca is sonus de su sardu funti scritus no cun is arrègulas de
s'italianu, ca dus stròcinti, ma cun arrègulas agatadas a posta po su sardu,
po dus incrarai, po dus abalorai, e po dus fai prus simplis, po kini su sardu
est imparendiddu imoi e po kini du scit jai puru. Su ki ndi bessit est unu sardu
campidanesu friscu e lìmpiu ke s'akua 'e mitza, e custu tòcat a d'apretziai de
prus ancoras, pròpiu ca su libru s'arreferit a is pipius, est a nai a is
personis ki funti su benidori de sa lìngua sarda, ca ki su sadru no du
impàrant imoi, a intr''e cincuant'annus at'essi mortu jai, ca no nç'ant'essi
prus personis bonas a du fueddai.
A faci de cust'abisonju, a sa bon'ora est bessiu custu libru, e a sa bon'ora
cumèntzant a bessiri librus po pipius in campidanesu puru. E insaras donaus is
norabonas a s'imprentadori, ki at obertu una cannaca de librus po pipius (ki
custu ki seus narendi esti su primu sceti), a maista Gina Farci e a totu is ki
trabàllanta ke issa (e funti medas e de prus sempri), a Teresa Tinti sa
disinnadora e a Antoni Lèpori ki s'est espressau de manera crara cument'a
sempri. Ma a primu 'e totus, donaus is norabonas a totu is pipias e is pipius
sardus de oi, ki custu libru esti po issus, po dus ajudai a connosci, a fueddai
e a scriri su sardu cumenti dis spètat, po podi cresci de sa mellus manera.
|
Aleni e su contu de unu nau de trigu